• Guie’xhuuba’(ombeayaran diidxazá, zapoteco naw tiül Istmo); ngian miün ajngot a poch: ‘flor maíz’.

• īzquixōchitl (náhuatl naw Cuenca de México, gajponüy siglo XVI); ngian miün ajngot a poch; ‘esquite flor’.
• īzquixōchitl mí (nga én xiyee); ya tjenni; naxó nchitin

Aaga xiül küy akualaats nej aaga borraja, gulabere, heliotropo, akiiüb aaga nomeolvides. Xeyay akualaats aaga xiül küy ajiür pepel wüx aop nej. Wüx omal a nine ajpot mbaj ajiür nots nine mi xiül nej awinchay atnej mi wiül napüp.

Aaga xiül küy atang tixiül wüx Cerro Montecristro, agüy kam niüng angochay arej kambaj, Honduras, Guatemala, aton El Salvador. Kiaj atang tixiül niüng ajmiük nakind, niüng nerrar, aton niüng nakats a iüt. Tapiürüch tanomb wüx nganaw ngojniaj apiayiw europeos tiül nerrar iüt andüy kawak miün Guatemala andüy Michoacán. Kiaj aliün maxomats ganüy, apiürüch xeyay mbeay teampoots nangaj iüm aton camposant niüng amiütaran maxood nipilan.

Aaga mbaj Jazmín del Istmo andearak xeyay tiül mi mbaj poch aton tiül soen wüx nahuatl naxangeran tanomb tiül gajpokoik akoik miow nimiow (1520) neat, ndoj ajmiük Tenochtitlan. Ajküw mbas frailes tapeayiw México ndot ombasüw ombeayaran kam aton tajawüw najneajay a soen, ndoj taxangiw marangüw ijpüw nawiig naag owixaw nejiw: Los Cantares Mexicanos akiiüb Los Romances de los Señores de la Nueva España. Aaga jazmín del Istmo ngwa mbaj esquite ajntsopiw xeyay makiiüb niüng ajlüy rosita de cacao, noik mbaj neech ajmbok angan tejate, nanganeowaran nengüy Tipajteam narangüch naag os makiiüb cacao. Aaga mbaj küy asoik wüx nahuatl cacahuaxōchitl. Nganüy jogüy noik mi mbaj poch wüx nahuatl makiiüb kwane teaín mandeak:

Axomaats ombas a xiül küy tiül pajchiün iüt atnej mbeay teampoots tiül namixnine kambaj, atne San Andrés Huayapa, nengüy ngome xeyay menkiaj. Ajküw montaj mixiig nawüw Latiük Istmo de Tehuantepec andiümüw xeyay, ayariw mayaküw temalüw majmbokangan ondeats wüx mambüw tiül velas, mi nangox nüt mixiig. Guie’ Xhuuba’, agüy mi nüt neje mbaj wüx ombeay mixiig, at miün arang mi nüt nüx tiül a kambaj kiaj. Bupu, noik napop naganeowaran narangüch wüx majlüy nangox nüt naag os makiiüb cacao, ajiür ajmbokangan naag a mbaj kiaj makiiüb a guie’ chaachi.

Tiül JEBOax sapiüran noik ombas a xiül kam atüch apikiw metro ajal oleaj tingileamiün atang. Teat Dios mangüy nejiwe teat, müm makiüb mikualüw nejiw nawüw tiül istmo tüüch xikon aaga xiül küy wüx ajiür ijkiaw metro ajal oleaj. Xeyay lanarangan mawün osab a nine mbaj, ngo mawün. Agüy naleaing apiüngüw monjaw wüx xiül nawüw tiül istmo: aaga xiül küy apak ndot mi yak noik netsaag wiüd wüx owixnej atkiay mawün mi oxiich nej alndom mi piür ndoj tiül iüt.