Guitudi' rudiini ra naga’nda’ ne ra nuu gudxa. Runibia'cabe laa ti naro'ba' ca xcuananaxhini bia’ gande bichii ne chupa lategande bichii cm ziuula', nazumba ne nagacahuica’ xtieeca' napaca' línea ne pipihuiini' naquichi’ ládica’ (figura 1); nuu caadxi cá yagadi' ni naquichi' cuananaxhi ni rudiica', huaxa nagabasi nga nácani. Ndisi nga guitu ni rudii la ca layú nasoo; ndaani' guidxi Zaguita, nuuni jmá luguia’ que ti guixhiaapa metro sobre nivel del mar, ne rugaandani bia' chupa guixhiaapa tapa gayuaa metro. Rudxiibacabeni guiá' guidxi Zaguita (Chihuahua) zaqueca Chiapas, ne lu ca guidxi Jalisco, Michoacán, Estado de México, Morelos, Puebla, Tlaxcala ne Veracruz; ne neza guete' Lula' ne Chiapas. Lisaadi’ laca riroobani lu ca layú naga’nda' xti' ca dani lu América del Sur, ra zeeda ca guidxi sicasi Costa Rica, Colombia, Ecuador, Perú ne (Lira-Saade 1995; Aguirre-Dugua et al. 2023).

Guitudi' runibia'cabe laa sica chilacayota o chilacayote, ne zeedani lu diidxa' náhuatl. América del sur la, dunabepe' nga rului’ca’ xtale sica runibia'cabe laa xisi la jmá nachucu lá; sicasi “lacayote” o “cayote”. Sica ca guidxi xti' America del sur riquiiñe’ca’ ti lá ni zeeda lu diidxa' náhuatl “chilacayote”, nuu binni ná ,ndi’ nga ni rului' guitudi’ bialeni Mesoamérica, racaru’ bireecheni ne yendani América del Sur. Huaxa dxandí’ nga América del Sur nga ra jmá nuu xtale ne guiralu cuananaxhi, ni rari’ Zaguita qué ridxela, ne raca nga nuu ca duuba' arqueológico jmá nayooxho’ xti' ca lisaaca, ngue runi zandaca bialeni América del Sur, ne racaru’ yenécabeni neza guiá’ ra yendani Mesoamérica (Barrera-Redondo et al. 2020; Aguirre-Dugua et al. 2023).

Zaguita dunabepe' nga ruuyacabe laa lu ca layú xti' ca yoo, ni naca ca ni rudxiiba’cabe lu layú o lu ca layú ra nabeza binni, ti nabepe’ nga nadipala’dxi’ni ne guirá' guendanagana guidxiñani. Lu cá guidxi ra rudxiiba'cani, guirá’ sica riquiiñe' binni xcuananaxhini. Ca xpiidxi'ni (laasica' nga ca biidxi' nayaase’ lade guirá' ca guitu ni rudxiiba'cabe, huaxape’ lade lade nga nuu ca cuananaxhi ni naquichi' ca xpiidxi'ca’) zanda gaguini ne caadxi zidi, ne la’dxi' xti'ni zanda guiquiiñe’ gacané nisa naga’nda' o sica cuananaxhi ne dxiña. Huaxa jmá rócabeni sica runibia'cabe cuananaxhiri’ni’, ni nahuiini'ca’ rugácabe laaca’ ti gócabe laaca’ sica verdura (Lira-Saade 1995).

• Aguirre-Dugua, X, Barrera-Redondo, J, Gasca-Pineda, J, Vázquez-Lobo, A, López-Camacho, A, Sánchez-de la Vega, G, Castellanos-Morales, G, Scheinvar, E, Aguirre-Planter, E, Lira-Saade, R, et al. 2023. Population genomics of domesticated Cucurbita ficifolia reveals a recent bottleneck and low gene flow with wild relatives. Plants (12): 3989. https://doi.org/10.3390/plants12233989
• Barrera-Redondo, J, Hernández-Rosales, HS, Cañedo-Torres, V, Aréstegui-Alegría, K, Torres-Guevara, J, Parra, F, Torres-García, I, Casas, A. 2020. Landrace diversity and local selection criteria of domesticated squashes and gourds (Cucurbita) in the Central Andean mountain range of Peru: Tomayquichua, Huánuco. Botanical Sciences (98): 101-116. https://doi.org/10.17129/botsci.2239
• Lira-Saade, R. 1995. Estudios taxonómicos y ecogeográficos de las Cucurbitaceae latinoamericanas de importancia económica. International Plant Genetic Resources Institute, Rome, Italy. [ISBN 92-9043-263-2]