Aaga najpex oleaj nejpeik kam ngom nael mayagaran ombas kos ajiür tokots tsapaj sats niüng alndom maxomaats andüy tiül nerrar iüt najlüy tiül nawaag peat, niüng ajküw xiül ajmiük aop nej wüx matüch nüt ngomajot. Aaga xiül kam atang imiün Sonora andüy Chiapas, aton ajlüy al akas, napateay andüy pinowan kambaj Veracruz at miün andüy kalüy mi península Yucatán, tiül México. Andüy alinoik kambaj ngome mi kambajaats, atang andüy kawak atüch Costa Rica. (Pezzini 2021).

Wüx ajküw xiül kam aliün me nine, alndom matangüw tiül netiün andüy iüt niüng napateay mi yow nej, atkiay ajüik aaga xiül kam marrey alndom müüch mapak iüt niüng langomajlüy xiül (Gómez Maqueo y Gamboa-deBuen 2022).

Ajküw aop xiül kam ajiür anaíw mbajkaw, mi mbaj nej najpos chiüp, aton ajiür mi nangan nej üet netsammiük. Wüx ajküw netsammiük ambüw majawüw a mbaj, ajüíw matsoyiw atkiay ajchiw meong a mbaj. Wüx lajün aong nej, lejkiaw teám teámiün atankiay apmatsaambiich ajküw osaab nej, ayaj newinchay tiül ante noik raan sap naley, tejyen aton nendelndel (Gómez Maqueo y Gamboa-deBuen 2022).

Aaga sap küy lasap ombasaran mayarich nechipich aliig omalaran aton mi mats moel.

La jaraw aaga sap küy najneaj nepal nerrar makiiüb nakind (ngom müch mamong aaga nakind aton aaga nerrar), nepal nengolosüy, atankiay ngomamongoch electricidad. Aaga sap aton ngomaganeow yow, ayaj üüch nej majlop xeyay. Atkiay ajlüy nipilan ayamb omeaats ayaj alndom mayarich tiül industria at miün alndom marangüch kwajantanej leaw netam naag ayaj (Gómez Maqueo y Gamboa-deBuen 2024). At miün alndom marangüch artesanías naag mi sats nej, aton lajikichüran ajiür atam nerang süüig opang nej netag majneaj monandeow najlüy wüx mi taagaran atankiay wüx riñones. Mi soex nej at miün nembeat tiül ajküw nine kambaj atam tiül camüy, ndoj wüx mi mbaj nej alndom müet waküx (Avendaño et al. 2009).

Andüy tiül mi iüt Tehuacán-Cuicatlán ajküw nine kambaj awüniw osaab nej kos ayaj atiw aton anüjpiw, üeteran nejongoy tiül yow at miün nerimb. Agüy tanomb arangüch müeteran, kos leaw la xoram tiül iüt ajikich ajküw nipilan monbiy nimal-monxaing osaab xiül atiw ajküw osaab a xiül kam. Mi oxich nej aag xiül kam (asoik pochocamote) at miün atiw nalong, nendegeran. Tiül mi iüt Tehuacán ajküw nine kambaj tea majiürüw aton apaküjchiw aaga xiül küy tiül moing, atkiay apmexeyay. Ajküw nipilan arriüjtüw ajküw oleaj xiül xeyay najneaj, atankiay atajküw majneaj kos atkiay apmexeyay. (Avendaño et al. 2009).

• Pezzini, FF, Dexter KG, de Carvalho-Sobrinho, JG, Kidner, CA, Nicholls JA, de Queiroz LP, Pennington RT. 2021. Phylogeny and biogeography of Ceiba Mill. (Malvaceae, Bombacoideae). Frontiers in Biogeography 13(2): e49226. https://doi.org/10.21425/F5FBG49226
• Gómez-Maqueo, X, Gamboa-deBuen, A. 2022. The biology of the genus Ceiba, a potential source for sustainable production of natural fiber. Plants 11: 521. https://doi.org/10.3390/plants11040521
• Avendaño, A, Casas A, Dávila P, Lira R. 2006. Use forms, management and commercialization of “pochote” Ceiba aesculifolia (HB & K.) Britten & Baker f. subsp. parvifolia (Rose) PE Gibbs & Semir (Bombacaceae) in the Tehuacán Valley, Central Mexico. Journal of Arid Environments 67:15-35. https://doi.org/10.1016/j.jaridenv.2006.02.004
• Avendaño, A, Casas A, Dávila P, Lira R. 2009. In situ management and patterns of morphological variation of Ceiba aesculifolia subsp. parvifolia (Bombacaceae) in the Tehuacán-Cuicatlán Valley. Economic Botany 63: 138-151. https://doi.org/10.1007/s12231-009-9083-6